«Үрдэл» пааркаҕа турбут «Razor Crest» хараабылы тыал суулларбыт

Дьокуускайга «Үрдэл» пааркаҕа турбут «Мандалорец» сериалтан Razor Crest (Гребень Бритвы) космическай хараабылы тыал суулларбыт.

«Массыынаҕа олордохпутуна эмискэ холорук курдук күүстээх тыал түспүтэ. Бастаан массыынаны эргитэн баран, аҕыйах сөкүүндэ иһигэр хараабылы суулларда. Хата иһигэр ким да суох этэ. Туох да ынырык суох, ким да эмсэҕэлээбэтэ. Билигин хараабыл тобохторун уонна үлтүркэйдэрин хомуйа бардыбыт», — диэн тутааччылартан биирдэстэрэ Айаал Федоров кэпсээтэ.

Хамаанда сотору кэминэн хараабылы чөлүгэр түһэрэр үлэни саҕалыырын бэлиэтээтэ.

Санатар буоллахха, хараабылы тутуу 2020 сыл ахсынньытыгар саҕаламмыт, каркааһын маһынан уонна ДВП-нан оҥорбуттар. Үрдүгэ түөрт миэтэрэ, устата уон түөрт миэтэрэ, кэтитэ уон миэтэрэ. 2021 сыл кулун тутар саҥата хараабылы Дьокуускай куорат «Үрдэл» пааркатыгар дьон көрүүтүгэр туруорбуттара.