«Үөрэх» национальнай бырайыагынан Саха сирэ бастыҥ көрдөрүүлээх

Үөрэх миниистирэ Сергей Кравцов мунньах кэмигэр «Үөрэх» национальнай бырайыагы олоххо киллэриигэ Саха сирэ биэс бастыҥ регион ахсааныгар киирэр диэбит.

Бу туһунан Ил Дархан уонна бырабыыталыстыба дьаһалтатын пресс-сулууспата иһитиннэрэр.

Өрөспүүбүлүкэҕэ национальнай бырайыакка көрүллүбүт үбү 78% туһаммыттар. Оттон дойдуга бу сыыппара 40%. Вице-премьер э.т. Сергей Местников этэринэн, учууталлары өйөбүлгэ ордук болҕомтону уурдулар.

2020 сылга федеральнай бүддьүөттэн Саха сирэ кылаас салайааччыларыгар эбии төлөбүргэ 547 мөлүйүөн солкуобай көрүллүбүт. Барыта холбоон 9,1 тыһыынчаттан тахса учуутал ылыахтаах. Алын кылаас үөрэнээччилэригэр босхо аһылыкка 2020 сылга 419 мөлүйүөн солкуобай, оттон 2021 сылга 1,2 миллиард солкуобай буолбут.

Быйыл бырайыак чэрчитинэн Саха сиригэр 2,47 млрд солк көрүллүбүт. Үөрэх кыһаларын техническэй базаларын саҥардыыга, дэгиттэр оҕолору сайыннарыыга, цифровой сайдыыга, спортивнай эбийиэктэргэ, оскуола, уһуйаан тутуутугар ороскуоттаныаҕа.