Үөрэнээччилэр информатикаҕа уонна ИКТ-га саҥа ирдэбилинэн эрчиллэр БКЭ туттардылар

Саха сирин оскуолаларын 11-с кылаастарын үөрэнээччилэрэ сэтинньи 19 күнүгэр информатикаҕа уонна информационнай-коммуникационнай технологияларга саҥа ирдэбилгэ эппиэттиир бүтүн Россиятааҕы эрчиллэр биир кэлим судаарыстыбаннай эксээмэҥҥэ кыттыыны ыллылар. Бу туһунан СӨ үөрэххэ министиэристибэтин пресс-сулууспата иһитиннэрэр.

Холонуу уопсайа 66 пууҥҥа, Роспотребнадзор ирдэбилигэр сөп түбэһэр бары санитарнай-эпидемиологическай нуормалары тутуһан ыытыллыбытын туһунан Саха сиригэр үөрэх хаачыстыбатын кэтээн көрөр киин дириэктэрэ Надежда Попова бэлиэтээтэ.

Түмүк сэтинньи 30 күнүн кэнниттэн биллиэҕэ.

«Биир кэлим эксээмэҥҥэ учууталбын кытта 9-с кылаастан саҕалаан бэлэмнэнэбит. Бу эрчиллэр эксээмэн буоларын өйдүүбүн, онон улаханнык долгуйбатым. Мин санаабар, эрчиллэр эксээмэн сүрүн соруга — бэйэҥ мөлтөх миэстэлэргин булуу уонна инникитин кинилэри кытта үлэлэһии, итиэннэ эксээмэн процедуратын кытта билсии. Компүүтэргэ туттарыы быдан табыгастаах дии саныыбын – кумааҕыга сыыһаны көннөрөр буоллаххына бириэмэҕин сүтэрэҕин, манна тута судургутук көннөрүөххэ сөп», – диэн Бэрдьигэстээх оскуолатын 11-с кылааһын үөрэнээччитэ Леонид Хурда санаатын үллэстэр.

2021 сылга оскуоланы бүтэрээччилэр информатика эксээмэнин бастакытын көмпүүтэр нөҥүө туттарыахтара. Ол сыалтан үөрэх уонна наука эйгэтин кэтээн көрөр федеральнай сулууспа эрчиллэр тэрээһиннэри ыытыыны тэрийдэ.