РФ үөрэҕириитин миниистирин солбуйааччы Татьяна Васильева Саха сиригэр кэллэ

РФ үөрэҕириитин  миниистирин солбуйааччы Татьяна Васильева Саха сиригэр үлэтинэн кэлбитин туһунан Үөрэҕирии уонна наука министиэристибэтин пресс-сулууспата иһитиннэрэр.

         От ыйын 13 күнүгэр Хаҥалас оройуонугар сырыы чэрчитинэн Татьяна Васильева Өктөмнөөҕү наука, үөрэх киинигэр, Покровскай куорат 1-гы нүөмэрдээх оскуолатыгар, Мохсоҕоллоох орто оскуолаларыгар, БКЭ уонна ГТА туттарар пууннарга тэрээһини көрдө.

         «Барыта чуолкайдык, сөптөөхтүк  тэриллибитэ, оҕоҕо үтүө сыһыан көстөр. Тэрийээччилэр анал ыйыынан эрэ буолбакка, судургута суох эпидемия ыарахан быһыыта-майгыта турбутун үрдүнэн,  оҕо уоскулаҥнык сананарын туһугар ураты болҕомто уураллар», — диэтэ миниистир солбуйааччыта.

         От ыйын 14 күнүгэр Татьяна Васильева өрөспүүбүлүкэ үөрэҕириитин уонна наукатын миниистирэ Михаил Сивцевы кытта  Нам улууһугар сырытта. Делегация Нам 1-гы нүөмэрдээх орто оскуолатыгар уонна «Күнчээн» диэн саҥа уһуйааҥҥа ыалдьыттаата.

         Миниистири солбуйааччы Хаҥаласка курдук эксээмэн ыытыллар пууннара үрдүк бэлэмнээхтэрин бэлиэтээтэ.