РФ Үтүөлээх бырааһа Иван Егоров COVID-19 утары быһыыны ылла

Бэҕэһээ, тохсунньу 15 күнүгэр, Россия уонна Саха АССР үтүөлээх бырааһа, профессор, медицинэ наукатын доктора Иван Егоров, баҕа өттүнэн коронавирустан быһыыны ылла. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Россия санитарнай-эпидемиологическай сулууспатын бочуоттаах үлэһитэ кутталлаах инфекционнай ыарыылары сэрэтэр үлэ туһунан бэйэтин санаатын үллэһиннэ.

«Өрөспүүбүлүкэҕэ коронавирустан быһыы оҥоһуллан саҕалаабытын истэн, баҕа өттүбүнэн быһыыны ыларга быһаарынным. Чинчийиилэри, медосмотру аастым уонна быһыыны ыллым. Суукка ааста, туругум этэҥҥэ, учугэй настарыанньалаахпын. Аны 21 күнүнэн быһыыны иккис төгүлүн ылабын. Өрөспүүбүлүкэ бары олохтоохторун вакцинацияны бараргытыгар ыҥырабын, биһиги доруобуйабыт — бэйэбит илиибитигэр», — диэтэ Иван Егоров.

30 сыл ыстаастаах киһи быһыытынан, кини Россияҕа оҥоһуллубут вакцина бары нуормаҕа уонна ирдэбилгэ олоҕуран оҥоһуллубутугар эрэллээҕин эттэ.

Саха сиригэр коронавирус ыарыыта туруоҕуттан, дьаһалта, бырабыыталыстыба уонна өрөспүүбүлүкэ суһал штабын былааннаах үлэтин түмүгэр коронавируһу утары систиэмэлээх үлэ тэриллибитин бэлиэтээтэ.

«Ыарыы саҕаланыыта анаалыс түмүктэрин Новосибирскай куораттан кэтэһэр буоллахпытына, билигин, медицинэ тэрилтэлэригэр, оройуоннааҕы киин балыыһаларыгар, СПИД-кииҥҥэ лабораториялар тэрилиннилэр. Куораттарга уонна улуустарга куойка пуондата, инфекционнай стационардар уонна обсерватордар сөптөөхтүк тэрилиннилэр. Биһиги быраастарбыт Москва куорат улахан балыыһаларыгар үөрэннилэр», — диэн кини бэлиэтээтэ.

Үтүөлээх быраас Саха сиригэр коронавируһу утары үлэ үрдүк таһымҥа тэриллибитин туһунан эттэ.

«Мин 54 сыл устата бырааһынан, 26 сыл өрөспүүбүлүкэ сүрүн санитарнай бырааһынан, 4 сыл СӨ доруобуйа харыстабылын миниистиринэн үлэлээн кэллим. Онон урут кэлэн ааспыт кутталлаах ыарыылары утары охсуһуутааҕар, коронавируһу утары үлэ үрдүк таһымҥа ыытыллар», — диэн кини түмүктээтэ.