Россияҕа коронавируһунан икки киһи ыалдьыбыт

Россияҕа икки киһи коронавируһунан ыалдьыбытын Россия бырабыыталыстыбатын бэрэссэдээтэлин солбуйааччы Татьяна Голикова биллэрдэ. Ыалдьыбыт дьон Кытай олохтоохторо буолара бэлиэтэнэр. Бу туһунан ТАСС иһитиннэрэр.

«Забайкальскай кыраайга уонна Тюмень уобалаһыгар коронавирус инфекциятынан икки киһи ыалдьыбытын Роспотребнадзор сулууспалара иһитиннэрдилэр. Кинилэргэ анал изоляторга наадалаах өҥө оҥоһуллар», — диэн Татьяна Голикова эттэ.

Роспотребнадзор баһылыга Анна Попова коронавируһунан ыалдьыбыт дьон температурата суох бигэ туруктаахтарын биллэрдэ.

Россияҕа коронавирус тарҕанар куттала суоҕун туһунан Роспотребнадзор бигэргэттэ.

Кытайга 9,8 тыһыынчаттан тахса киһи ыалдьыбыта уонна 200-тэн тахса киһи өлбүтэ бэлиэтэнэр.