Россияҕа медик-устудьуоннары үксүн целевой сүүмэрдээһининэн салгыы үөрэтиэхтэрэ

2021 сылга медицина салааларыгар бүддьүөт миэстэлэрин баһыйар үгүстэрэ Россия үрдүк үөрэхтэрин кыһаларыгар целевойунан хаалыахтара.

«Бу балыыһалары уонна поликлиникалары саҥа каадырдарынан, үөрэҕи бүтэрээччилэри үлэнэн хааччыйыаҕа», — диэн 2021 сылга үрдүк үөрэх кыһаларыгар целевой үөрэтиигэ ылыы хааччаҕын бигэргэтэр уураах суругар этиллэр.

Устудьуоннар үлэ биэрээччи салаатыгар босхо үөрэнэллэр. Диплом ылан баран үөрэттэрбит тэрилтэҕэ үстэн кырата суох сыл үлэлиэхтээхтэр.

2021-2022 үөрэх сылыгар «Лечебное дело» салааҕа целевой миэстэ 70 %, «Педиатрия» — 75 %, үлэһит тиийбэт салааларыгар — 100 %. Ол курдук, «Анестезиология», «Рентгенология», «Кардиология», «Пульмонология», «Неврология», «Оториноларингология», «Офтальмология», «Бактериология», «Инфекционнай ыарыылар» салааларыгар.

2020 сылга РФ бэрэсэдьиэнэ Владимир Путин федеральнай түмсүү суругун түмүгүнэн, медицина салааларыгар целевой үөрэх квотатын үрдэтии туһунан соруйбута бэлиэтэнэр.

«Радиоэлектроннай систиэмэлэр уонна комплекстар», «Тимир суол», «Поезд сырыытын хааччыйар систиэмэлэр» хайысхаларга 70 % тэҥнэстэ.

2020 сыл алтынньыга колледжтарга уонна үрдүк үөрэх кыһаларыгар целевой үөрэтии туһунан балаһыанньаны РФ бырабыыталыстыбатын бэрэссэдээтэлэ Михаил Мишустин бигэргэппитэ. Балаһыанньаҕа этиллэринэн, целевой бырагырааманан үөрэнэн бүтэрбит киһиэхэ үлэ биэрээччи аккаастыыр түбэлтэтигэр, устудьуон үөрэммит ороскуотун бүддьүөккэ төннөрөр. 2021 сыл тохсунньу 1 күнүттэн бу балаһыанньа олоххо киирэр.

Санатан эттэххэ, Хотугулуу-Илиҥҥи федеральнай үнүбэрсиэт 375 бүтэрэр эдэр исписэлииһи бэлэмниир. СӨ Доруобуйа харыстабылын министиэристибэтэ 2021-2022 үөрэх дьылыгар ХИФУ ординатуратын бырагырааматынан үөрэтиигэ 147 целевой миэстэ көрдөөтө.