Россияҕа үстэриттэн сэттэлэригэр диэри саастаах оҕолорго көрүллэр төлөбүр үрдүөҕэ

Россия бэрэсидьиэнэ Владимир Путин Кремльга сенатордары кытта көрсүһүү кэмигэр үстэриттэн сэттэлэригэр диэри саастаах оҕолордоох дьиэ кэргэттэргэ көрүллэр төлөбүрү үрдэтэргэ соруйда.

Бүгүҥҥү күҥҥэ бу төлөбүр кээмэйэ хас биирдии региоҥҥа олохтоммут тиийинэн олоруу алын кээмэйин аҥарыгар тэҥнэһэр, эбэтэр дойду үрдүнэн ортотунан 5,5 тыһыынча солкуобайга.

Владимир Путин бу миэрэлэр көдьүүстэрин сыаналааһын уонна ирдэнэр түгэнигэр тиийинэн олоруу алын кээмэйигэр тиийэ улаатыннарыы былааннанарын санатта.

«Бүддьүөтү оҥоруу үлэтигэр 2021 сылтан саҕалаан бу төлөбүр кээмэйин үрдэтии кыаҕын көрөргө көрдөһөбүн. Бырабыыталыстыба тиийинэн олоруу алын кээмэйиттэн намыһах дохуоттаах дьиэ кэргэттэргэ эбии өйөбүл оҥоруу чуолкай ирдэбиллэрин быһаарыахтаах», — диэн дойду баһылыга эттэ.