Россия бэрэсидьиэнэ Саха сиригэр олорор 95 сааһын туолбут Аҕа дойду Улуу сэриитин кыттыылааҕын эҕэрдэлээтэ

Дойду бэрэсидьиэнэ уонна өрөспүүбүлүкэ салалтата Аҕа дойду Улуу сэриитин кыттыылааҕа, Хаҥалас улууһун бочуоттаах олохтооҕо Афанасий Соловьеву 95 сааһын туолбутунан эҕэрдэлээтилэр.

Аҕа дойду Улуу сэриитин бэтэрээнэ Россия бэрэсидьиэнэ Владимир Путин уонна Ил Дархан Айсен Николаев ааттарыттан эҕэрдэ аккырыыккалары тутта. СӨ баһылыгын уонна бырабыыталыстыбатын дьаһалтатын салайааччыта Афанасий Владимиров үбүлүөйдээх ытык кырдьаҕаска Ил Дархан уонна өрөспүүбүлүкэ салалтатын ааттарыттан бэлэх туттарда.

«Кытаанах олох оскуолатын ааһан, сэрии ыар сылларын эккинэн-хааҥҥынан билэн, Аҕа дойду сэриитин кэнниттэн дойдубут атаҕар турарыгар туруулаһан үлэлээбитин. Аҕа дойдуга күүстээх тапталы, кини билиҥҥитин уонна инникитин иһин эппиэтинэһи биһиэхэ тириэрдэҕин», — диэн Владимир Путин эҕэрдэтигэр этиллэр.

Хорсун-хоодуот санаатынан уонна быһыытынан өстөөҕү кытта туруулаһыыга бэйэтин сүдү кылаатын киллэрбитин, улахан тургутуулары ааспытын уонна Улуу кыайыы кэнниттэн дойдубут сөргүтүллэригэр төһүү күүс буолбутун Айсен Николаев бэлиэтээтэ.

Афанасий Соловьев 1925 сыл тохсунньу 26 күнүгэр Орджоникидзевскай оройуон Иһит сэлиэнньэтигэр күн сирин көрбүт. 1944 сыллаахха Сэбиэскэй Сойуус Аҕа дойдуну көмүскээччилэрин кэккэтигэр киирбит. Забайкальскай уокурукка Монголияны кытта кыраныыссаҕа минометнай батальонҥа сибээс үлэһитинэн сулууспалаабыт. Харбин куорат кыргыһыытыгар кыттыыны ылбыт. Аҕа дойду сэриитин II-с истиэпэннээх уордьанын кавалера, «Бойобуой өҥөтүн иһин» уонна «Дьоппуон дойдутун кыайыы иһин» мэтээллэр хаһаайынара.

Сэрии кэнниттэн «Орджоникидзевскай» совхозка үлэлээбит. Хаҥалас улууһун бочуоттаах олохтооҕо. Билигин Дьокуускай куоракка олорор, үс сиэн уонна сэттэ хос сиэн амарах эһэтэ буолар.

«Кыайыы болуоссатыгар буолар Улуу Кыайыы параадыгар хайаан да кэлиэм», – диэн Афанасий Соловьев эттэ.