Россия бырабыыталыстыбата Арктикаҕа олохтонор саҥа бырайыактарга чэпчэтиилэри бигэргэттэ

Тохсунньу 30 күнүгэр Россия бырабыыталыстыбата Арктикаҕа саҥа бырайыактары олоххо киллэрэр инвестордарга чэпчэтиилэри көрүү туһунан сокуоннар барылларын бигэргэттэ. Бу туһунан РБК иһитиннэрэр.

Арктика регионугар киирсэр сиргэ регистрацияламмыт, ону тэҥэ 10 мөлүйүөн солкуобайтан аҕыйаҕа суох суумалаах саҥа бырайыактары олоххо киллэрэр хампаанньалар, эбэтэр урбаанньыттар резидент статуһун ылаллара уонна кэккэ нолуогабай уонна да атын чэпчэтиилэргэ тиксэллэрэ бэлиэтэнэр.

Сокуон барылларыгар углеводороднай оттук матырыйааларын хостуур, айылҕа уонна да атын гаастары оҥорон таһаарар, портары уонна бырамыысыланнай тэрилтэлэри тутар инвестиционнай бырайыактарга чэпчэтиилэр көрүллэллэрэ ыйыллар.

«Маннык бырайыактарга маҥнайгы 12 сылга сиртэн хостонор саппаас баай дохуотугар көрүллэр нолуок кээмэйэ 0 %-ҥа тэҥнэһиэҕэ, 13-с сылларыттан саҕалан 17-с сылларыгар диэри толору ставкаҕа тахсыахтара. Түмүгэр 10 триллион солкуобай кэриҥэ инвестициялаах үс улахан ниэптээх сири баһылааһыны ылыахпыт», — диэн Россия Уһук Илини уонна Арктиканы сайыннарыыга миниистирин эбээһинэһин толорооччу Александр Козлов эттэ.

Маны таһынан нолуогабай буолбатах чэпчэтиилэр көрүллэллэрэ ыйыллар. Олор истэригэр урутаан сайдыы сиридэригэр уонна Владивосток көҥүл пуордугар тэҥнээх резидент ураты сирин тэрийии киирэр.