Россия чэпчэки атлетикаҕа күрэҕэр саха спортсмена биир сантиметрнан боруонсаҕа тиийбэтэ

Саха спортсмена Диана Адасько дойду бастыыр иһин күрэҕэр биир сантиметрнан боруонса наҕараадаҕа тиксибэтэ. Бу туһунан «Спорт Якутии» иһитиннэрэр.

Дьокуускайтан сылдьар Россия спордун маастара, аан дойду таһымнаах күрэхтэр кыттыылаахтара үс төгүл ыстаныыга 23-гэр диэри саастаах юниордар бөлөхтөрүгэр кытынна.

«Диана Адаськоҕа боруонса мэтээли ыларга биир сантиметр тиийбэтэ. Ыстаныыга бастыҥ холонуутун көрдөрүүтэ 12.95 миэтирэҕэ тэҥнэстэ. Бу кини 2018 сыллаахха 13.45 миэтирэҕэ тэҥнэһэр бэйэтин рекордуттан ыраах көрдөрүү», — диэн этиллэр.

Бу көрүҥҥэ кыайыылааҕынан Александра Красина (13.50) буолла, үрүҥ көмүһү Александре Скобел (13.40) ылла, боруонса мэтээли — Анна Федорова (12.96).

Дойду чөмпүйэнээтигэр ядрону анньыыга үрүҥ көмүс мэтээли урут Саха сирин аатыттан кыттыбыт, Россия үтүөлээх тренерэ Николай Колодко иитиллээччитэ Максим Афонин ылбыта бэлиэтэнэр. Кини көрдөрүүтэ 20.37 миэтирэҕэ тэҥнэстэ.

Бүтүн Россиятааҕы чэпчэки атлетика чөмпүйэнээтэ Челябинск куоракка ааста. Күрэххэ дойду 68 регионуттан 900-кэ спортсмен кыттыыны ылла. Чөмпүйэнээт Россия 23-гэр диэри саастаах юниордарын бастыыр иһин күрэҕин кытта тэҥҥэ ыытылынна.