Россия көҥүл тустууга чемпионатын түмүктэрэ – «Спортклуб» биэриигэ

НВК САХА – От ыйын 5-7 күннэригэр Сочига Россия көҥүл тустууга чемпионата буолан ааста. Маныаха Саха сирин сүүмэрдэммит хамаандатын салайааччыта Вадим Семенов, Саха араадьыйатын дириэктэрин солбуйааччы, спортивнай суруналыыс Николай Бястинов “Спортклуб” биэриигэ ыалдьыттаатылар. Уопсай түмүк, уолаттар хайдах киирсибиттэрин туһунан кэпсээтилэр. Саха сириттэн манна 19 бөҕөс кытынна. “Биир боруонса мэтээл кэллэ. Улаханнык эрэммит уолаттарбыт Виктор Рассадин, Арыйаан Тютрин, Эдуард Григорьев, хомойуох иһин, мэтээл аҕалбатылар. Арыйаан киирсиитэ мөккүөрдээх буолла”, – диэн бэлиэтиир Вадим Семенов.

Санатан эттэххэ, хапсыһыы бүтэрэ кэлбитин кэннэ Арыйаан Тютрин очукуону тэҥнээбитэ. Ол кэннэ биир сөкүүндэ хаалбытын кэннэ судьуйа Дагестан бөҕөһүгэр биир очукуону аахпыта. Мөккүһүү, аахсыы өр буолбута.

“Эдэр уолаттар Петя КонстантиновАйсен Адамов бэркэ туһуннулар. Улахан аренаҕа бастакытын таҕыстылар. Салгыы кинилэр тустарынан эмиэ истиэхпит дии саныыбын. Өйдөөн халбыт түгэммит диэн Арыйаан Тютрин балыйсыылаах киирсиитэ буолла. Судьуйалар биир сөкүүндэ хаалбытын кэннэ баал биэрэн кэбиспиттэрэ”, – диир Бястинов.

Биэриигэ салгыы хас биирдии бөҕөс хайдах тустубутун ырыттылар.