Россия Кубогар Саха сирин спортсменнара 15 мэтээли ыллылар

Өрөспүүбүлүкэ спортсменнара Москва куоракка ыытыллыбыт аһаҕас Россия Кубогар стритлифтинг көрүҥҥэ тоҕус кыһыл көмүс, түөрт үрүҥ көмүс уонна икки боруонса мэтээллэри ыллылар. Бу туһунан стритлифтинг федерациятын норуоттар икки ардыларынааҕы салаатын бэрэссэдээтэлэ Алексей Иванов иһитиннэрдэ.

Турнир сэтинньи 7 уонна 8 күннэригэр үс хайысханан ыытылынна: классическай двоеборье, буруустарга анньыныы, турникка тардыныы.

Ол түмүгэр, Дьокуускайга ыытыллыбыт стритлифтинг турнирын призера Тургун Егоров, стритлифтинг көрүҥҥэ уонна спортивнай гимнастикаҕа спорт маастара Леонид Саммель уонна бастакытын күрэхтэһэр Александра Барашкова классическай двоеборьеҕа кыһыл көмүс мэтээли ыллылар. Саха сиринээҕи тааска ыттыы уонна альпинизм федерациятын чилиэнэ, 2019 сыллаахха ыытыллыбыт РФ чемпионатын кыттыылааҕа Елена Цой үс хайысхаҕа барытыгар үрүҥ көмүс мэтээли ылары ситистэ.

Александра Барашкова бурууска анньыныыга уонна турникка тардыныыга икки кыһыл көмүс мэтээли, хапытаан Леонид Саммель анньыныы турнирыгар кыһыл көмүһү ыллылар.

Александр Харчев Россия үс төгүллээх чөмпүйүөнэ уонна юниордарга абсолютнай киирсиигэ үһүс миэстэ буолла. Турнирга спорт маастарын аатын ылла.

Алексей Иванов этэринэн, аныгыс түһүмэх 2021 сыл ыам ыйыгар буолуохтаах Аан дойду чемпионата буолар.