Россия Олимпийскай кэмитиэтин бэрэсидьиэнэ «Манчаары оонньууларыгар» кэлиэҕэ

Россия Олимпийскай кэмитиэтин бэрэсидьиэнэ Станислав Поздняков «Манчаары оонньуулара» национальнай спорт көрүҥнэрин Спартакиадатыгар бочуоттаах ыалдьыт быһыытынан кэлиэҕэ.

Бу туһунан быһа эпиир кэмигэр СӨ физическэй култууратын уонна спордун миниистирэ Иннокентий Григорьев иһитиннэрдэ.

«Кини «Манчаары оонньуулара» үөрүүлээх аһыллыытыгар уонна спорт национальнай көрүҥнэригэр аналлаах научнай-практическай конференцияҕа кыттыыны ылыаҕа», — диэтэ кини.

Маны таһынан, Иннокентий Григорьев бэлиэтээбитинэн, күрэхтэһиигэ спорт биэс эбийиэгэ хабыллыаҕа. Ол иһигэр — Бэрдьигэстээх сэлиэнньэтигэр тутулла турар спорт комплекса уонна 150 миэстэлээх саҥа спорт былаһаакката.

«Манчаары оонньуулара» 2021 сыл, сайын Горнай улууһун Бэрдьигэстээх сэлиэнньэтигэр ыытыллыаҕа. Күрэхтэһиини Россияҕа эрэ буолбакка, кыраныысса таһыгар эмиэ интэриэһиргииллэрин миниистир бэлиэтээтэ.