Россия тимир суолунан Кытайтан кэлэр-барар сырыыны толору тохтотто

Олунньу 3 күнүттэн «Россия тимир суоллара» хампаанньа саҥа коронавирустан саҕаламмыт пневмония күөдьүйүүтүттэн сылтаан, пассажирдарга тимир суолунан Кытайга кэлэр-барар сырыыны толору тохтотто. Бу туһунан ТАСС иһитиннэрэр.

Тустаах иһитиннэрии хампаанньа официальнай сайтыгар олунньу 2 күнүгэр таҕыста.

Олунньу 3 күнүттэн «Кытай тимир суоллара» тэрийэр «Пекин — Москва», «Чита — Забайкальск — Пекин», уларытан олордуута суох вагоннардаах «Москва — Пекин» хайысханан сылдьар поезтар сырыылара тохтотулунна. «Олунньу 1 күнүгэр «Москва — Пекин» хайысханан уларытан олордуута суох вагоннардаах айанаабыт поезд «Москва — Забайкальск» хайысханан туһаайыллыаҕа», — диэн хампаанньа бэлиэтээтэ.

Туһаныллыбатах билиэттэрин пассажирдар толору төннөрүөхтэрин сөбө ыйыллар.

Инники этиллибитинэн, олунньу 1 күнүттэн Россия Кытайы кытта сөмөлүөтүнэн сырыыны хааччахтаабыта.