Россия үрдүнэн ювелирдар күннэрэ бэлиэтэннэ

Алтынньы 23 күнүгэр Россия үрдүнэн ювелирдар күннэрэ бэлиэтэннэ. Өрөспүүбүлүкэҕэ көмүс оҥоһугун уонна алмааһы кырыылыыр бырамыысыланнас эйгэтигэр идэлээх үлэһиттэри Дьокуускайдааҕы бырамыысыланнай техникум бэлэмнээн таһаарар.  

Дьиримниир көмүс киэргэл тута чочуллан тахсыбат. Уран тарбахтаах тугу токуйдаабытын маҥнай кумааҕыга уруһуйдаан, мээрэйдээн ойуулуур. Эдэр ювелирдар судургуттан, латунь таастан саҕалаан салгыы үрүҥ көмүскэ көһөллөр. Тиһэҕэр ураты кэрэ оҥоһуктары таһаараллар. Үлэлэрэ WorldSkills курдук араас таһымнаах күрэхтэргэ, быыстапкаларга дьон киэҥ биһирэбилин ылар.

WorldSkills идэ таһымын быһаарар күрэхтэһии ыытыллар буолуоҕуттан, техникум  баазата лаппа тупсубут, саҥа тэриллэри ылбыттар.  Ол эрэн,  кырыылааһын үгүс түһүмэҕэ билигин да илиинэн оҥоһуллар. Итинтэн сиэттэрэн, уһуйааччылар аныгы технологияны үөрэтиигэ көһөр баҕалаахтар.

Үөрэх кыһата күн бүгүн ювелирдары тохсус уонна алмаас кырыылааччылары 11 кылаас кэннэ үөрэтэр. Ааспыт сылтан техникум «Кангаласс» уруттаан сайдыы сиригэр баар көмүс оҥоһугу кырыылыыр кластеры кытта үлэлэһэр. Инникитин кластерга 300 үлэ миэстэтэ тахсыахтаах. Устудьуоннар быйыл онно практикаларын  ааспыттар. Үөрэхтэрин бүтэрээри сылдьар эдэр ыччаттан сороҕо кластер резиденэ буолан, бэйэтин дьыалатын тэринэр  соруктаах.