Россия үөрэҕириигэ министиэристибэтэ үрдүк үөрэххэ туттарсыы саҥа ирдэбилин олохтоото

2021-2022 үөрэх дьылыгар дойду үрдүк үөрэх кыһаларыгар устудьуоннары үөрэххэ ылыы саҥа быраабылалара киириэхтэрэ. Бу туһунан Россия үөрэҕириигэ министиэристибэтэ иһитиннэрэр.

«Россия үөрэҕириигэ министиэристибэтэ бакалавриат, специалитет уонна магистратура бырагыраамаларынан үөрэххэ ылыы саҥа бэрээдэгин бигэргэттэ. Саҥа быраабылалар 2021-2022 үөрэх дьылыгар олоххо киириэхтэрэ. Сүрүн болҕомто үрдүк үөрэх кыһатылара үөрэххэ ылыыны ыытар уонна абитуриеннар туттарсар кыахтарын кэҥэтиигэ уурулунна», — диэн этиллэр.

2021-2022 үөрэх дьылыттан үрдүк үөрэх кыһаларыттан докумуоннары электронно тутуу булгуччу ирдэнэр буолуоҕа. 2020 сылга докумуоннары олохтоммут эпидемиологическай балаһыанньанан сибээстээн электроннай быһыылаах туппуттара. Ону тэҥэ абитуриеннар сайабылыанньаларыгар уларытыыны киллэрэр эбэтэр иккис сайабылыанньаны киллэриэхтэрин сөп буолуоҕа.

Үөрэх кыһатыгар туттарсыы куонкуруһун испииһэгэ күҥҥэ биэстэн аҕыйаҕа суох саҥардыллар буолуоҕа. Инники испииһэги саҥардыы күҥҥэ биирдэ эрэр оҥоһуллар этэ.

Ону тэҥэ хас да уруулуу идэлэргэ эбэтэр улахан бөлөхтөрүнэн бэлэмниир хайысхаларга биир кэлим куонкуруһу ыытар кыах киллэрилиннэ. Инники куонкурус хас биирдии идэҕэ эбэтэр хайысхаҕа тус туспа ыытыллара ирдэнэр этэ.

Саҥа быраабыланан үрдүк үөрэх кыһалара хас да предметтэринэн туттарсыы тургутуутун олохтуохтарын сөп, ону абитуриеннар бэйэлэрэ талаллар.

«Холобура физика уонна информатика предметтэринэн тургутуу. Онуоха абитуриент бэйэтин көрүүтүнэн физика эбэтэр информатика биир кэлим эксээмэнин түмүгүн тиксэриэн сөп», – диэн этиллэр.

Орто анал уонна үрдүк үөрэх баазатыгар туттарсар абитуриеннарга киирии тургутуутун үөрэх кыһата бэйэтэ олохтуохтуур буолуоҕа. Ону тэҥэ үөрэх тэрилтэлэрэ туттарсыы куонкуруһугар кыттар идэлэр уонна бэлэмнэнии хайысхаларын ахсаанын бэйэлэрэ быһаарыахтарын сөп.

Бакалавриат уонна специалитет бырагыраамаларынан бүддьүөт миэстэтигэр очнай үөрэххэ ылыы бэрээдэгин судургуттулар. Үөрэххэ ылыы икки түһүмэҕинэн ыытыллар буолуоҕа: приоритетнай түһүмэх (льготалаах эбэтэр целевой үөрэниигэ дуогабар түһэрсибит абитуриеннары тургутуута суох ылыы) уонна сүрүн түһүмэх. Инники үс түһүмэҕинэн ыытыллар этэ, иккис түһүмэх бастакы уонна иккис долгуҥҥа арахсара.

Үрдүк үөрэх кыһалара сүрүн түһүмэх түмүгүнэн аһаҕас миэстэлэр хааллахтарына, абитуриеннары эбии тургутуу испииһэгэр олоҕуран ылыахтарын сөп.

Үөрэх кыһалара үөрэххэ ылыы туһунан иһитиннэриини иннинээҕи сыл сэтинньи 1 күнүттэн хойутаабакка бэйэлэрин официальнай сайтарыгар таһаарыахтара.