Россия үөрэҕириигэ министиэристибэтин делегацията үөрэх кыһаларыгар сырытта

Россия үөрэҕириигэ миниистирин солбуйааччыта Екатерина Толстикова салалталаах делегация Дьокуускай куорат 26-с №-дээх оскуолатыгар, Арктикатааҕы култуура уонна искуустуба институтугар, үөрэҕириини сайыннарыы уонна кваливикацияны үрдэтии институутугар сырытта. Бу туһунан СӨ үөрэххэ уонна наукаҕа министиэристибэтин пресс-сулууспата иһитиннэрэр.

Миниистир солбуйааччыта Дьокуускай 26-с №-дээх оскуолатын учууталларын кытта эбэҥки тылын үөрэтии методическай арыаллааһынын туһунан кэпсэттэ. Манна 1 «В» кылааһыска эбэҥки тылын үөрэтиини киллэрбиттэр. Учуутал Наталья Ушницкая үөрэх бырагырааматын кытта билиһиннэрдэ.

«2016 бэчээттэнэн тахсыбыт учебник көмөтүнэн, алын кылаастарга омук тылын үөрэтии ньыматын туһанабыт. Орто сүһүөх кылаастарга ананан сиэрийэ бэлэмнэнэ сылдьар. Билигин биһиги сүрүн кыһалҕабытынан — орто уонна үрдүкү кылаастарга учебниктар суохтарана буолар», — диэн Наталья Ушницкая эттэ.

Сэтинньи 16-17 күннэригэр Екатерина Толстикова салалталаах Россия үөрэҕириигэ миниистирин делегация Дьокуускага үлэлиир.

Бүгүн, сэтинньи 17 күнүгэр, Дьокуускайга Хоту, Сибиир уонна Уһук Илин аҕыйах ахсааннаах норуоттарын үөрэҕириилэрин боппуруостарынан көрсүһүү уонна үөрэҕириилэрин өйүүр миэрэлэри координациялыыр биэдэмистибэлэр икки ардыларынааҕы үлэ бөлөҕүн мунньаҕа ааһыаҕа.