Төрүт сокуоҥҥа киирэр уларыйыылары талар куоластааһыҥҥа мобильнай сыһыарыы оҥоһуллуоҕа

Төрүт сокуоҥҥа киирэр уларыйыылары уонна көннөрүүлэри талар куоластааһыҥҥа киин быыбардыыр хамыыһыйа мобильнай сыһыарыы оҥоруоҕа. Бу туһунан РИА Новости иһитиннэрэр.

Киин быыбардыыр хамыыһыйа бэрэссэдээтэлэ Элла Памфилова тириэрдэринэн, куоластааһын иннинэ киэҥ далааһыннаах тарҕатар-иһитиннэрэр үлэ ыытыллыаҕа.

«Киирэр уларыйыылар уонна көннөрүүлэр бүтэһик бигэргэммит көрүҥнэрэ брошюра быһыытынан бэчээттэниэҕэ. Куоластааһын хаһан, ханна уонна хайдах ыытылларын туһунан иһитиннэрии нэһилиэнньэҕэ хайа баҕарар быһыынан тиэрдиллиэҕэ: плакат, мобильнай сыһыарыы, көрбөт дьоҥҥо анал суругунан уонна да атыннык», — диэн этиллэр.

Инники этиллибитинэн, дойду бэрэсидьиэнэ Владимир Путин киин быыбардыыр хамыыһыйаҕа Төрүт сокуоҥҥа киирэр уларыйыылар уонна көннөрүүлэр бүтүн Россиятааҕы куоластааһыннарын тэрийэн ыытарга соруйбута.