Россия учуонайдара Саха сирин ирбэт тоҥун былыргы вирустарын үөрэтиэхтэрэ

РФ Үрдүк үөрэх уонна наука министиэристибэтин экспериментальнай медицинэтин институтун учуонайдара өрөспүүбүлүкэҕэ 200 тыһыынча сыл кэриҥэ дьапталлан сыппыт ирбэт тоҥ бактерияларын уонна вирустарын кулун тутартан чинчийэн саҕалыахтара. Бу туһунан ТАСС иһитиннэрэр.

Чинчийээччилэр этэллэринэн, булуллубут микроорганизмнар саҥа антибиотик айылларыгар туһалаах буолуохтарын сөп. Үөрэтиллэр матырыйааллары Үөһээ Дьааҥы улууһун Баатаҕай термокарстовай кратерыттан ылыахтара.

«Хоту баар саамай тымныы сир буолан интэриэһиргэтэр. Геологтар дааннайдарынан, бу сиргэ кырата 200 тыһыынча сыл устата уһулуччу геологическай уларыйыы буолбатах. Биһиги бу сиртэн былыргы бактериялары уонна вирустары көрдүүбүт», — медицинэ наукатын доктора, микроорганизмнар геномикаларын уонна протеомикаларын функциональнай лабораторияларын салайааччыта Артемий Гончаров.

Кини этэринэн, микроорганизмнары ылар туһуттан бу оройуоҥҥа скважина хаһан керн ылыахха наада.

«Сир дьапталлан сытар араҥатын бэрээдэгин кэспэккэ бактерияларын кытта биологическай чинчийиллэр матырыйааллары ылыахпыт», — диэтэ учуонай.

Кини этэринэн, булуллубут микроорганизмнар саҥа антибиотик айылларыгар төһө туһалааҕын учуонайдар сыаналыахтара.