Россия-Япония Арктикаҕа бииргэ үлэлээһиилэрин Дьокуускайга дьүүллэһиэхтэрэ

Балаҕан ыйын 30 күнүгэр Дьокуускай куоракка «Тымныы сирдэр» («Холодные земли») Россия уонна Япония холбоһуктаах семинардарын кыттыылаахтара Хотугу сир уонна Арктика социальнай-экономическай сайдыытыгар, ону тэҥэ Арктика регионнарыгар ананар технологияларга сыһыаннаах бырайыактары дьүүллэһиэхтэрэ. Бу туһунан ТАСС иһитиннэрэр.

«Хотугу кыыл таба экологическай туругун кэтээн көрүү уонна урутаан билии, территорияны сайыннарыы экологическай бырайыактара, Арктика арыыларын туруктара уонна кинилэр климат уларыйыытыгар адаптациялара, Арктикаҕа дааннайдары ырытыы кииннэрин сайыннарыы — курдук тиэмэлэр ыйылыннылар», — диэн тэрийэр кэмитиэт бэрэстэбиитэлэ, СӨ үөрэҕириигэ уонна наукаҕа миниистирин бастакы солбуйааччыта Михаил Присяжный сырдатта.

Тэрийээччилэринэн СӨ үөрэҕириигэ уонна наукаҕа министиэристибэтэ, ону тэҥэ Япония уонна Россия экономическай бииргэ үлэлээһиилэригэр уонна гуманитарнай атастаһыыларыгар каадырдары бэлэмниир платформа секретариата буолаллар. Семинар Япония уонна Россия регионнарын икки ардыларынааҕы атастаһыы сылын чэрчитинэн дойдулар үнүбэрситиэттэрин, хампаанньаларын уонна судаарыстыбаннай уорганнарын бэрэстэбиитэллэригэр анаан ыытыллар.

Туруктаах сайдыы Хотугу форума Дьокуускайга балаҕан ыйын 27-30 күннэригэр ыытыллара былааннанар. 2020 сылга форум сүрүн тиэмэтинэн Хотугу сир уонна Арктика тырааныспартынай инфраструктуратын сайнанарыы кыахтара буолла.

Форум чэрчитинэн сүрүн болҕомто Арктика хотугулуу-илиҥҥи сиригэр-уотугар ууруллуоҕа. Манна климат уларыйыыта киэҥник бэлиэтэнэринэн сибээстээн, аан дойдутааҕы экспертнэй уопсастыба кыттыылаах киэҥ хабааннаах чинчийиилэр ыытыллаллара ирдэнэр.