Россиятааҕы ФАС коронавирустан эмп муҥутуур сыанатын быста

РФ Федеральнай антимонопольнай сулууспата коронавирустан эми оҥорон таһаарааччы атыылыыр муҥутуур сыанатын, таблетка иһин 100 солкуобайынан быста. Бу туһунан «Российская газета» иһитиннэрэр.

РФ Доруобуйа харыстабылын министиэристибэтэ, чопчулаан эттэххэ, уоптабай уонна розничнай, нолуок эбиитэ суох, эми оҥорон таһаарааччы сыанатын регистрациялаата. Сотору кэминэн регион былаастара антимонопольнай сулууспаны кытта уоптабай уонна розничнай сыанаҕа эбии муҥутуур кээмэйин быһаарыахтара уонна бигэргэтиэхтэрэ.

«Судаарыстыбаннай реестр дааннайынан 200 мг-наах «Авифавир» 10 устууката биир тыһыынча солкуобайга тэҥнэһиэҕэ, онтон 40 устуукалаах эмп 4000 солкуобайга, 50 устууката — 5000 солкуобайга», — диэн иһитиннэриигэ этиллэр.

200 мг-наах 40, эбэтэр 100 устуука таблеткалаах «Арепливир» сыаната 4000 уонна 10 000 солкуобайга тэҥнэһиэҕэ.

ФАС суоттааһынынан, COVID-19 ыарыыттан препарат муҥутуур атыыланар сыаната регистрацияламмытын кэннэ, 50 таблеткалаах хаа эмп нолуок эбиитин учуоттаан 5500 солкуобайга тэҥнэһиэҕэ.

«Муҥутуур атыыланар сыана 50-тан тахса % намтааһына дьон атыылаһарыгар тоҕоостоох буолуоҕа», — диэн ФАС иһитиннэрдэ.

Фавипиравирга олоҕуран оҥоһуллубут эмп муҥутуур сыаната, эбиилэри ааҕан туран, 6 875 солкуобайга тэҥнэһиэн сөбүн туһунан дьаһалтаҕа аахтылар. Оттон билигин хааҕа 50 устуука таблеткалаах эмп сыаната 11 320-тэн 16 306 солкуобайга тиийэ халбаҥныыр.