Руслан Тимофеев Дьокуускай баһылыгын солбуйааччытынан ананна

Өрөспүүбүлүкэ киин куоратын баһылыгын солбуйааччытынан уонна дьаһалта аппараатын салайааччытынан Руслан Тимофеев ананна. Бу туһунан Дьокуускай куорат дьаһалтата иһитиннэрэр.

Иһитиннэриини бүгүн, муус устар 5 күнүгэр, куорат уопсай былаанныыр мунньаҕар баһылык Евгений Григорьев тириэртэ.

Руслан Владимирович 1983 сыл олунньу 4 күнүгэр Саха АССР Ленинскэй оройуонун Ньурба бөһүөлэгэр төрөөбүтэ.

Кини 2006 сыллаахха Саха государственнай үнүбэрсиэтин бүтэрэн, история учууталын идэтин баһылаабыта. Российскай Федерация бэрэсэдьиэнин иһинэн норуот хаһаайыстыбатын уонна судаарыстыбаннай сулууспа академиятыгар «Судаарыстыбаннай уонна муниципальнай салалта» исписээлнэһинэн магистр истиэпэнин ылбыта.

Бу иннинэ Аллараа Халыма үөрэҕин управлениетыгар исписэлииһинэн, Саха сирин ыччатын политикатын министиэристибэтигэр, Дьокуускай куорат Октябрьскай уокуругун управлениетын исписэлииһинэн үлэлээбитэ.

Дьокуускай куорат дьаһалтатыгар ыччат уонна дьиэ кэргэн политикатын управлениетын, уопсастыбаны кытта сибээстэһии департаменын салайбыта. Маны таһынан, СӨ бырабыыталыстыбатын уонна баһылыгын дьаһалтатын маассабай коммуникациятын уонна департамент информационнай политикатын салайааччытынан үлэлээбитэ.

Дьокуускай куорат баһылыгын солбуйааччытынан ананыан иннинэ «Саха сирин Конгреһын-киинэ» Судаарыстыбаннай автономнай тэрилтэни салайбыта.