Үс саха тустууга Коркин турнирын финалыгар таҕыстылар

Дмитрий Коркин кэриэһигэр көҥүл тустуу норуоттар икки ардыларынааҕы 12-с турнирын финалыгар үс саха бөҕөһө таҕыста.

Ол курдук Арыйаан Тютрин финал аҥаарыгар Алдар Бальжинбаевы кыайбыта, турнир түмүктүүр түһүмэҕэр Жаргал Дамдиновы кытта киирсиэҕэ.

Виктор Рассадин Чингизхан Эрдоганы кыайда, оттон Белоруссия аатыттан кыттар Ньургун Скрябин Булат Батоевы хотто.

Сарсын, алтынньы 12 күнүгэр, Скрябин уонна Рассадин 65 кг диэри ыйааһыҥҥа киирсиэхтэрэ.

Дмитрий Коркин кэриэһигэр көҥүл тустуу норуоттар икки ардыларынааҕы 12-с турнира алтынньы 11-13 күннэригэр Дьокуускайга ыытыллар.

Алтынньы 12 күнүгэр турнир түмүктүүр түһүмэҕин «Саха» НКИХ уонна «Якутия 24» ханааллар 17.00 чаастан 20.00 чааска диэри көрдөрүөхтэрэ. «Мамонт» ханаалга 10.00 чаастан 15.00 чааска диэри уонна 17.00 чаастан 20.00 чааска диэри көстүөҕэ.