Саҥа култуура дьиэтигэр сылдьыы балтараа төгүл улаатта

Горнай улууһун Дьиикимдэ нэһилиэгэр «Култуура» национальнай бырайыак чэрчитинэн тутуллубут култуура дьиэтигэр сылдьыы икки ый устата балтараа төгүл улаатта. Бу туһунан СӨ култуураҕа уонна духуобунай сайдыыга министиэристибэтин пресс-сулууспата иһитиннэрэр.

«Биһиги Россия үрдүнэн үлэҕэ бэлэм култуура дьиэтин тыа сиригэр арыйааччыларга бастакы буолбуппут. Манна элбэх саала холбоһон турар. Ол курдук, 125 миэстэлээх киэҥ сыаналаах саала, иккис этээскэ улуус уһулуччулаах поэта Семен Данилов уонна суруйааччы Софрон Данилов айар үлэлэригэр аналлаах мусуой баар», — диэн биэдэмэстибэ баһылыга Юрий Куприянов тыллара этиллэр.

2019 сыл маҥнайгы кыбаарталыгар 1206 киһи сылдьыбыта, саҥа дьиэ үлэҕэ киирбитин кэннэ, 2020 сыл тохсунньу уонна олунньу ыйдарыгар 1993 киһи сылдьыбыта бэлиэтэнэр.

Эбийиэги тутуутугар бэдэрээлинэй уонна өрөспүүбүлүкэ бүддьүөттүттэн 104,83 мөлүйүөн солкуобай көрүллүбүтэ.

Өрөспүүбүлүкэҕэ «Култуура» национальнай бырайыагы олоххо киллэрии 2019 сылтан саҕаламмыта. Икки култуура дьиэтэ тутуллубута, өрөспүүбүлүкэ аҕыс оҕо искусство оскуолатын уонна музыкальнай колледжын музыкальнай инструменнарынан уонна тэбээриннэринэн хааччыйдылар. Маны тэҥэ Россия сүрүн музыканнара кыттыылаах квалификация үрдэтэр куурустар ыытыллыбыттара, улуустарга саҥа киинэ көрөр саалалара аһыллыбыттара.