Саха бөҕөһө Эдуард Григорьев Польшаҕа аһаҕас Кубокка киирсэргэ бэлэмнэнэр

«Иван Ярыгин» Гран-При турнирын призера, устудьуоннарга аан дойду чемпиона Эдуард Григорьев аныгыскы нэдиэлэҕэ Марчин Юрецкай сырдык кэриэһигэр Польша Кубогар киирсээри бэлэмнэнэр. Бу туһунан «Спорт Якутии» иһитиннэрэр.

Чурапчытааҕы спортивнай бэлэмнэнии киинин дириэктэрэ Александр Андреев этэринэн, Эдуард гражданствотын уларытыы этэҥҥэ түмүктэммит.

«Билигин докумуоннарын оҥорон баран, иһинээҕи күрэхтэһиигэ бэйэтин үчүгэйдик көрдөрүөн наада. Римҥа олунньу 10-16 күннэригэр ыытыллыахтаах Европа чемпионатыгар талыллара буоллар. Онно бастакы хардыынан Польша Кубога буолар», — диэтэ кини.

Европа чемпионатыгар 61 киилэҕэ диэри ыйааһыннаахтарга тустуо, оттон Польшаҕа 65 киилэҕэ диэри киирсиэҕэ.