Саха национальнай библиотекатыгар коворкинг саалата баар буолла

Өрөспүүбүлүкэ национальнай библиотекатыгар «Библио-кластер» коворкинг саалата үлэтин саҕалаата. Бу туһунан тэрилтэ пресс-сулууспата иһитиннэрэр.

50 миэстэлээх саалаҕа араас хабааннаах презентациялар, лекциялар, уһуйуулар уонна маастар-кылаастар ыытыллыахтара, ону тэҥэ дьыалабыай форумнар, уопсастыбаннас көрсүһүүтэ уонна айар куттаах дьон айар киэһэлэрэ ааһыахтара.

«Коворкинг-саала интернет ситимҥэ холбонуулаах түөрт анал үлэлиир миэстэнэн, босхо wi-fi-нан, презентацияҕа туһаныллар аппаратуранан хааччылынна. Тэрээһиннэри библиотека үлэлиир болдьоҕун кэмигэр ыытыахха сөп», — диэн этиллэр.

Ону тэҥэ ирдэбил уонна эрдэттэн сөбүлэһии баар буоллаҕына, саала киэһээҥҥи бириэмэҕэ уонна өрөбүллэргэ эмиэ үлэлиэн сөп.