«Саха» НКИХ уруоктара» бырайыак киэҥ биһирэбили ылла

«Саха» НКИХ уруоктара» бырайыак учууталлар, үөрэнээччилэр уонна төрөппүттэр биһирэбиллэрин ылла. Бу туһунан СӨ үөрэҕириигэ уонна наукаҕа министиэристибэтин пресс-сулууспата иһитиннэрэр.

«Саха» национальнай көрдөрөр-иһитиннэрэр хампаанньа ханаалларыгар тохсус уонна 11-с кылаас үөрэнээччилэригэр күннэтэ көстөр видео-уруоктары өрөспүүбүлүкэ сүрүннүүр педагогтара ыыталлар.

Ил Дархан Айсен Николаев быһаарыытынан предметтэр көрүҥнэрэ элбээтэ уонна көстөр бириэмэлэрэ уһаата. «Нуучча тыла» уонна «Математика» предметтэриттэн ураты эбии «Обществознание», «Английскай тыл», «Нуучча литературата» ыытыллар буоллулар.

«Уруоктар олус ис хоһоонноохтор уонна сүрүн суолтатынан үөрэнээччилэр өрөспүүбүлүкэ уопуттаах учууталларын кытта дьиэлэриттэн олорон дьарыктаныахтарын сөбө буолар. Предметтэр ис хоһоонноро оскуола бырагырааматын барытын хабар. Үөрэнээччи хаһан баҕарар талбыт тиэмэтин хаттаан көрөр кыахтаах», — диэн Чурапчытааҕы орто оскуолата иһитиннэрэр.

Уус Алдан улууһун Майаҕас орто оскуолата бэлиэтииринэн, дистанционнай уруоктар оскуоланы бүтэрээччилэр түмүк аттестацияҕа бэлэмнэнэллэригэр уонна хаачыстыбалаах билиини ылалларыгар төһүү күүс буолаллар.

2020 сыл кулун тутар 25 күнүттэн муус устар 22 күнүгэр диэри уопсайа 164 уруок уһулунна. Видео-уруоктар «Саха» НКИХ ханаалыгар муус устар 30 күнүгэр диэри көстүөхтэрэ.

Биэриилэри толору «Саха» НКИХ ютуб ханаалыгар киирэн көрүҥ.