Саха продюсердара XXII-с бүтүн Россиятааҕы киинэ бэстибээлигэр бастыҥнарынан ааттаннылар

Продюсердар Сардаана Саввина уонна Семен Шишигин Барнаул куоракка ыытыллыбыт XXII-с Шукшин аатынан бүтүн Россиятааҕы киинэ бэстибээлигэр режиссер Дмитрий Давыдов «Ийэкээм» («Нет Бога кроме меня») хартыынатынан «Бастыҥ продюсерскай үлэ» анал аат хаһаайыттарынан буоллулар. Бу туһунан «Саха» НКИХ иһитиннэрэр.

«Кырдьыктык эттэххэ, биһиги, продюсердар наҕарааданы ылыахпыт диэн күүппэтэхпит. Дмитрий Давыдовы режиссура иһин, эбэтэр киинэҕэ оонньообут артыыстары наҕараадалыахтара дии санаабыппыт. Биһигини бэлиэтээбиттэриттэн олус астынным, тоҕо диэтэргин куонкуруска аҕыс хартыына көстүбүтэ. Бэстибээлгэ кыттарга Василий Шукшин «Кырдьык — майгыга-сигилигэ» («Нравственность есть Правда») этиитинэн ойуулуохха сөп киинэлэр сүүмэрдэнэллэр», – диэн продюсер Сардаана Саввина кэпсээтэ.

Шукшин аатынан бүтүн Россиятааҕы киинэ бэстибээлин куонкуруһун бырагырааматыгар «Нет Бога кроме меня», «Я свободен», «Седьмой пробег по контуру земного шара», «Отряд Таганок», «Залиния», «Куратор», «Калашников», «Смотри как я» хартыыналар киирдилэр.

Киинэлэри балаҕан ыйын 3, 4 уонна 5 күннэригэр Барнаул куорат аһаҕас былаһааккаларыгар сибиэһэй салгыҥҥа көрдөрдүлэр. Түмүк балаҕан ыйын 5 күнүгэр кыттааччылары кытта быһа сибээс кэмигэр биллэрилиннэ.

XXII-с Шукшин аатынан киинэ бэстибээлигэр Гран-при уонна бастыҥ режиссура анал аат хаһаайынынан режиссер Вадим Дубровицкай «Залиния» хартыыната ааттанна. 2019 сыллахха режиссер Любовь Борисова «Мин үрдүбэр күн хаһан да киирбэт» («Надо мною солнце не садится») киинэтэ XXI-с Шукшин аатынан бүтүн Россиятааҕы киинэ бэстибээлин Гран-при хаһаайынынан буолбута.