Саха сирэ саҥа тутууга бэриллэр ипотека өлүүтүнэн бастыҥнар испииһэктэригэр киирдэ

ЦИАН көрдөрүүтүнэн, саҥа тутуллубут олорор дьиэҕэ ипотека кирэдьиитэ 2020 сыл бастакы аҥарыгар Санкт-Петербург, Москва, Дьокуускай уонна Краснодар куораттарыгар элбэхтик бэриллибит. Бу туһунан ТАСС иһитиннэрэр.

Россия олохтоохторо сыл аҥарыгар 173 тыһыынчаттан тахса саҥа тутуллубут олорор дьиэҕэ ипотека кирэдьиитинэн туһаммыттарын Россия баанын статистиката көрдөрөр. Бу көрдөрүү 2019 сыл бастакы аҥарын көрдөрүүтүнээҕэр 8,6 %-нан үрдүк. 2020 сыл бэс ыйыгар саҥа тутуллубут олорор дьиэҕэ ипотека кирэдьиитин ставката ортотунан 6,09 % тэҥнэспит.

«Бастакы сүһүөх эргиэҥҥэ ипотека саамай үрдүк өлүүтэ (олорор дьиэҕэ бэриллибит кирэдьиит уопсай ахсааныттан) сыл бастакы аҥарын түмүгүнэн: Санкт-Петербург (49%), Москва (45%), Дьокуускай (42%), Краснодар кыраайа (42%) уонна Рязанскай уобалас (40%)», — диэн чинчийиигэ этиллэр.

Портал аналитиктара этэллэринэн, Саха сирэ бастыҥнар ахсааннарыгар сылга 2%-ҥа  бэриллэр Уһук Илиҥҥи ипотека бырагырааматын көмөтүнэн киирбит.

ЦИАН экспертэрэ өрөгөйүөннэргэ саҥа тутуллубут олорор дьиэҕэ ипотека ставкатын кэтээн көрдүлэр. Уһук Илиҥҥи ипотека бырагыраамата баар буолан, Уһук Илиҥҥи федеральнай уокурук өрөгөйүөннэригэр саамай намыһах ставка баара бэлиэтэннэ. 2020 сыл бэс ыйыгар Дьокуускайга саҥа тутуллубут олорор дьиэҕэ ипотека ортотунан 2,68%-ҥа бэриллибит.