Саха сирэ саамай ааҕар өрөспүүбүлүкэнэн ааттанна

Бүгүн, сэтинньи 18 күнүгэр, Саха сирэ бүтүн Россиятааҕы «Саамай ааҕар өрөспүүбүлүкэ-2020» куонукрус кыайыылааҕынана ааттанна. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

«Бүгүҥҥү күнтэн Саха сирэ — Россия саамай ааҕар өрөспүүбүлүкэтэ буолла», — диэн Россиятааҕы кинигэ сойууһун бэрэсэдьиэнэ, куонкурус дьүүллүүр сүбэтин бэрэссэдээтэлэ Сергей Степашин иһитиннэрдэ. Кини Ил Дархан Айсен Николаевка «Россия литературнай флагмана» статуэткатын уонна кыайыылаах дипломун туттарда.

Саха сирин баһылыга этэринэн, модельнай бибилиотекалары тэрийии национальнай бырайыагын көмөтүнэн, икки сыл иһигэр, өрөспүүбүлүкэҕэ 10 библиотека аһылынна.

«Бүгүҥҥү туругунан, модельнай библиотекалар аныгы ирдэбилгэ эппиэттиир хааччыллыылаахтар. Дьокуускайга дойдуга суох, бастыҥ библиотека аһылынна, оҕоҕо кыра эрдэҕиттэн ааҕыыга тапталы үөскэтэр ураты эйгэҕэ кубулуйда. Элбэҕи ааҕар киһи сайдар, иннин хоту баран иһэр», — диэтэ Айсен Николаев.

Национальнай библиотекаҕа саха библиотекаларын кинигэлэрин пуондатын хаҥаталларыгар сертификат тиксэрбиттэрэ бэлиэтэнэр.

Куонкуруска Россия бары регионнара кытталлар. Дьүүллүүр сүбэҕэ улахан кинигэ кыһалара уонна суруйааччылар киирэллэр. Сыана араас киритиэрийинэн бэриллэр: нэһилиэнньэ ааҕар дьонун, ыччатын ахсаанынан, оскуола библиотекаларын көрдөрүүлэринэн, кинигэ маҕаһыыннарынан. Сүрүнэ — регионнар бырайыактара.

«Бары ааҕабыт» өрөспүүбүлүкэтээҕи бырайыак «Сэрии туһунан кинигэ ааҕабыт» диэн этии чэрчитинэн 15 тыһыынчаттан тахса тэрээһини ыытта. Аахсыйаҕа 10 тыһыынчаттан тахсса киһи кыттыыны ылла.

Бырагыраама биэс сыллаах, өрөспүүбүлүкэ нэһилиэнньэтин араас араҥата кинигэни ааҕыытыгар научнай чинчийии уонна кэтээн көрүү ыытыллар. 2024 сылга диэри олохтоох дьон 76 %-на ааҕыынан хабыллара сабаҕаланар.