Саха сирэ сабыллыбыт бөһүөлэктэр олохтоохторун көһөрүүгэ 288 мөл.солк. ылыа

Саха сирин сабыллыбыт бөһүөлэктэрин олохтоохторун көһөрүүгэ 288 мөлүйүөнтэн тахса солкуобай ыытыллыаҕа. Бу туһунан ТАСС иһитиннэрэр.

«Балаҕан ыйын бүтүүтэ Россия тутууга министиэристибэтэ Уһук Хоту уонна онно тэҥнэммит сирдэргэ сабыллыбыт нэһилиэнньэлээх пууннартан көһөр олохтоохторго анаан, бу сыл төрдүс кыбаарталыгар олорор дьиэ судаарыстыбаннай сертификаттарын таһаарыы туһунан ыйааҕы таһаарбыта. Өрөспүүбүлүкэ уопсайа 288 мөлүйүөн 185,5 тыһыынча солкуобай суумалаах 112 сертификаты ыллыаҕа», – диэн этиллэр.

Олорор дьиэ сертификаттарын улахан аҥара 1997 сыллаахха сабыллыбыт Дьааҥы улууһун Лазо бөһүөлэгин олохтоохторугар бэриллэрэ бэлиэтэнэр. Нэһилиэнньэлээх пуун кыһыл көмүстээх сири байытыы кэмигэр тэриллэн, хайаны байытар киин оруолун толороро. Бырамыысыланнай үлэлэр түмүктэммиттэрин кэнниттэн бөһүөлэк быраҕыллыбыта, кэлин сабыллыбыта.

Сорох олохтоохтор туоһулуур докумуоннара суох буолан олорор дьиэ субсидиятын ылбатахтар. 2010 сыллаахха Дьааҥы оройуоннай суута 95 дьиэ кэргэни субсидия ылар бырааптаах гражданнар испииһэктэригэр киллэрбит.

Төлөбүр суумата дьиэ кэргэн састаабыттан, биир киһиэхэ уонна иккиттэн элбэх ахсааннаах дьиэ кэргэҥҥэ көрүллэр олорор дьиэ иэнин нуорматыттан көрөн ааҕыллар.

«2005-2011 сылларга Саха сиригэр сабыллыбыт 12 бөһүөлэк олохтоохторугар уопсайа 1 282 олорор дьиэ сертификата бэриллибитэ. 2011-2020 сыллар усталарыгар өрөспүүбүлүкэ салалтата федеральнай былаас уорганнарын кытта, прописката эбэтэр үлэ кинигэтигэр тустаах сурутуута суох буолан сертификат ылар бырааптарынан туһамматах дьиэ кэргэттэргэ, сүтэрбит бырааптарын толуйуу туһунан кэпсэтии ыытта » – диэн өрөспүүбүлүкэ бырабыыталыстыбатын бэрэссэдээтэлин солбуйааччытын э.т. Кирилл Бычков эттэ.