Саха сирэ уонна Россия наукаларын академиятын Сибиирдээҕи салаата бииргэ үлэлэһиэхтэрэ

Саха сирэ уонна Россия наукаларын академиятын Сибиирдээҕи салаата (СО РАН) өрөспүүбүлүкэҕэ наука, научнай-техническэй уонна инновация хайысхаларыгар күүстэрин холбуохтара. Ол курдук бүгүн, алтынньы 10 күнүгэр, Ил Дархан Айсен Николаев уонна Россия наукаларын академиятын бэрэсидьиэнин солбуйааччы, Россия наукаларын академиятын Сибиирдээҕи салаатын бэрэссэдээтэлэ, академик Валентин Пармон бииргэ үлэлэһэр туһунан сөбүлэҥ түһэристилэр. Бу туһунан СӨ баһылыгын уонна бырабыыталыстыбатын пресс-сулууспата иһитиннэрдэ.

Онон өрөспүүбүлүкэ социальнай-экономическай сайдыытыгар тэҥҥэ бырайыак толкуйдуурга, научнай-техническэй бырагыраамалары олоххо киллэрэргэ, Саха сирин тыйыс усулуобуйатыгар аныгы технологиялары тардан, тэҥҥэ үлэлэһии үлэ сүрүн хайысхатын ыйдылар.

Ону таһынан СО РАН уонна СӨ наукаларын академиятын учуонайдарын үлэлэригэр ыйан-кэрдэн биэрэр туһунан кэпсэттилэр.

Саха сиригэр «Наука» национальнай бырайыак чэрчитинэн аан дойдутааҕы таһымнаах Наука киинин тэрийэргэ уонна өрөспүүбүлүкэҕэ наука сайдыытыгар үрдүк таһымнаах каадырдары бэлэмнииргэ көмөлөһөр туһунан этии киирдэ.

Айсен Николаев этэринэн, Саха сирэ курдук бөдөҥ регион учуонайдар күүстэрэ суох сайдара сатаммат.

«Кэлэр уонунан сылларга өрөспүүбүлүкэ социальнай-экономическай сайдыытын Стратегиятын олоххо киллэрэргэ бары хайысхаларга хайаан даҕаны науканы туһаныахха наада. Онон бүгүн баттаммыт сөбүлэҥ өрөспүүбүлүкэ социальнай-экономическай сайдыытыгар Россия наукаларын академиятын Сибиирдээҕи салаатын уонна Россия наукаларын академиятын кыттыһыннарары көрөр»,- диэн Айсен Николаев эттэ.

Оттон Валентин Пармон эппитинэн, бастатан туран, геологияҕа, геологическай чинчийэн көрүүгэ, Арктика уонна Хотугу сир усулуобуйаларыгар аныгы матырыйааллары оҥорон таһаарыыга тэҥҥэ үлэлэһиэхтэрэ.

«Ону таһынан култуура, тыл үөрэҕэр, медицинаҕа, тыа хаһаайыстыбатыгар эмиэ кэккэ ыйытыылар бааллар. Ону быһаарарга уонна үөрэтэргэ табыллан тэҥҥэ үлэлиэхпит диэн эрэнэбин», — диэтэ Пармон.