Саха сирэ Worldskills Russia чемпионакка «Прогресс года» хайысхаҕа кыайда

Саха сирэ идэтийии VIII Национальнай чемпионатыгар  (Worldskills Russia) «Прогресс года» анал ааты ылла.

«Былырыыҥҥыны кытта тэҥнээтэххэ элбэх ситиһиилээх регионнар бу ааты ылаллар. Быйыл Саха сирэ уонна Томскай уобалас наҕараадаланнылар», – дииллэр тэрийээччилэр. 

Саха сирин хомуур хамаандата уопсайа 24 наҕарааданы тутта: «Геодезия» хайысхаҕа биир кыһыл көмүс мэтээли, «3D Моделирование для компьютерных игр», «Звукорежиссура – Юниоры», «Машинное обучение и большие данные – Юниоры», «Ювелирное дело», «Ювелирное дело – Юниоры» хайысхаларга биэс үрүҥ көмүс мэтээли, «Администрирование отеля — Юниоры (10-12)», «Огранка ювелирных вставок», «Ресторанный сервис – Юниоры» хайысхаларга үс боруонса мэтээли уонна 15 мэтээли сатабылларын иһин.  

Быйылгы чемпионат түмүктүүр түһүмэҕэ саамай киэҥ хабааннаах буолла. 130 хайысханан 2,8 тыһыынча киһи Россияттан уонна тас дойдулартан кытынна. Саха сириттэн 74 хайысхаҕа 94 киһи кыттыбыт. 

WorldSkills ирдэбилинэн өрөспүүбүлүкэ орто анал үөрэхтэрэ материальнай базаларын саҥардаллар. Үөрэх национальнай бырайыагын чэрчитинэн дойду үрдүнэн колледжтарга биэс тыһыынча аныгы мастарыскыай арыллыаҕа. 2020 сылга Саха сиригэр П.И.Дудкин аатынан энергетика коллеhыгар, Покровскайдааҕы колледжка, Дьокуускайдааҕы индустриальнай-педагогическай колледжка арыллыахтара. 2021 сылга эбии 28 мастарыскыай оҥоһуллара былааннанар, ол иһигэр 6 оройуоҥҥа.