Саха сиригэр 14 ойуур баһаара бара турар

Уокка былдьаммыт 720 га иэннээх сиргэ өрөспүүбүлүкэҕэ 14 ойуур баһаара бара турар. Бу туһунан РФ Ыксаллаах быһыы-майгы министиэристибэтин Саха сиринээҕи салаатын пресс-сулууспата иһитиннэрэр. Умайыы бара турар сирин иэнэ 1,35 гааҕа тэҥнэһэр.

Суукка иһигэр икки ойуур баһаара күөдьүйдэ, үс баһаар умуруорулунна. Баһаары умуруорууга 234 киһи кытынна уонна 56 тиэхиньикэ туһанылынна.

«Суукка иһигэр баһаар ахсаана бииринэн, иэнэ 15 гаанан аччаата. Баһаартан сэрэхтээх буолуу үлэтэ ыытылынна, нэһилиэнньэлээх пууннарга уонна олох-дьаһах эбийиэктэригэр куттал суоһаабат», — диэн иһитиннэриигэ этиллэр.

Сөҥүү өр түспэтэҕинэн уонна сөкүүндэҕэ 5-10 миэтэрэ түргэннээх уларыйа турар тыал үрэринэн Чурапчы, Амма, Таатта, Томпо, Уус Майа, Хаҥалас, Өлүөхүмэ, Сунтаар, Үөһээ Бүлүү улуустарын уонна Миирнэй, Алдан оройуоннарын 39 нэһилиэнньэлээх пууннарыгар буруо биллиэҕэ.

Иһитиннэриигэ этиллэринэн, балаһыанньа мөлтүүр түгэнигэр, нэһилиэнньэлээх пууннары баһаартан харыстыырга 90 үлэһиттээх дьаһалта аэромобильнай бөлөҕө уонна тоҕус тиэхиньикэ бэлэм.