Саха сиригэр 18 тыһыынча сыл анараа өттүгэр олоро сылдьыбыт ыт оҕотун мумиятын буллулар

Россия уонна Швеция учуонайдара Саха сиригэр Индигир өрүс тардыытынан 18 тыһыынча сыл анараа өттүгэр олоро сылдьыбыт ыт оҕотун мумиятын буллулар. Бу туһунан The Siberian Times иһитиннэрэр.

Мумияны 2018 сыл сайын булбуттара бэлиэтэнэр. Хотугу сир прикладной экологиятын научнай-чинчийэр институтун учуонайдара, маҥнай булумнньу XIX үйэ бүтүүтэ олоро сылдьыбыт ыт көрүҥүн киэнэ буолар диэн аахпыттар.

Ол эрээри сыл устата ыытыллыбыт чинчийии түмүгэр ыт оҕотун мумията 15-40 тыһыынча сыл анараа өттүгэр, бөрөлөр уонна ыттар арахсыыларыгар олоро сылдьыбыт көрүҥҥэ сыһыаннаһара олохтоммут.

Чинчийээччилэр сабаҕалыылларынан Доҕор диэн ааттаммыт ыт оҕото икки ыйдааҕар өлбүт. Туохтан өлбүт биричиинэтэ биллибэт.

Ыт оҕото олус үчүгэй туруктаах биһиги кэммитигэр диэри хараллан кэлбит. Этэ, маҥнайгы тиистэрэ, түүтэ, кыламана, бытыга барыта баар. Аныгы ыт оҕолорунааҕар быдан бөдөҥ көрүҥнээҕэ бэлиэтэнэр. Ыт, бөрө, эбэтэр кинилэр көрүҥ быһыытынан арахсыыларыгар үөскүү сылдьыбыт, кинилэр икки ардыларынан быысаһар көрүҥ оҕото буолуон сөбө сабаҕаланар.

Чинчийиини ытааччы учуонайдар бу мумия билиҥҥи туругунан аан дойду үрдүнэн саамай былыргы ыт буолар дии саныыллар. Ыт оҕотун мумиятын чинчийэн үөрэтии салҕанар.