Саха сиригэр 230 биир кэлим эксээмэни туттарар пуун үлэлиэҕэ

Быйыл, 2020 сылга Саха сиригэр 230 биир кэлим судаарыстыбаннай эксээмэни туттарар пуун үлэлиэҕэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Олортон, уопсай үөрэхтээһин тэрилтэлэрин баазаларыгар – 224 пуун, ону тэҥэ доруобуйаларынан хааччахтаах оҕолор дьиэттэн туттаралларыгар анаан — алта пуун», – диэн этиллэр.

Эксээмэннэр саҕаланыахтарын иннинэ уонна түмүктэммиттэрин кэннэ туттарыы пууннарыгар дезинфекциялыыр сириэстибэлээх суйуу үлэлэрэ ыытыллыахтара, оскуолаҕа киирээччилэр температураларын кээмэйдиэхтэрэ, киирии ааннарга антисептиктар баар буолуохтара.

Эксээмэн туттарааччылар паартаҕа биирдии буолан, бэйэ-бэйэлэриттэн балтараа-икки миэтэрэ тэйиччи олордуллуохтара, ол аата кылааска аҕыстыы киһи. Маны тэҥэ Роспотребнадзор туттарааччылары мааскаларынан уонна бэрчээккэлэринэн хаачыйарга сүбэлээтэ.

Биир кэлим судаарыстыбаннай эксээмэн өрөспүүбүлүкэтээҕи систиэмэтигэр уопсайа 8 761 киһи бэлиэтэннэ, олор истэригэр 7 948 – 2020 сыллааҕы оскуоланы бүтэрээччи.