Саха сиригэр 30 тыһ. тахса оҕо сайыҥҥы куруһуоктарга дьарыктанар

Бэс ыйын 1 күнүттэн 30 тыһыынчаттан тахса оҕо босхо сайыҥҥы куруһуоктарга дьарыктанар. Бу туһунан «Эдэркээн сахалар» өрөспүүбүлүкэтээҕи ресурснай киин пресс-сулууспата иһитиннэрэр.

Дьарыктар федеральнай, региональнай уонна муниципальнай бырагыраамаларынан ыытыллаллар. Федеральнай бырагыраамаларынан 16 тыһыынча кэриҥэ оҕо дьарыктанара бэлиэтэнэр, өрөспүүбүлүкэтээҕи бырагыраамаларынан — 1,2 тыһыынчаттан тахса оҕо. 14 тыһыынча кэриҥэ оҕо Саха сирин улуустарын үөрэхтээһинин бырагыраамаларынан хабылынна.

«Муниципальнай бырагыраамалар биир уратыларынан олохтоохтор ирдэбиллэригэр индивидуальнай сыһыан буолар», – диэн этиллэр.

Хас биирдии оҕо олорор сириттэн тутулуга суох бэйэтэ сөбүлүүр куруһуогар суруттарыан сөп.