Саха сиригэр 39 ойуур баһаара баар

Бэс ыйын 22 күнүн туругунан өрөспүүбүлүкэҕэ уопсайа 359 066 гектар иэннээх сиргэ 39 ойуур баһаара бара турар, аһаҕас уот иэнэ 538,6 гектарга тэҥнэһэр. Бу туһунан ЫБММ өрөспүүбүлүкэтээҕи салаатын пресс-сулууспата иһитиннэрэр.

«Суукка иһигэр икки баһаар эбилиннэ, уот бара турар сирин иэнэ 82 976 гектарынан элбээтэ», — диэн министиэристибэ тириэрдэр.

Баһаардары умуруорууга уопсайа 282 киһи уонна 42 тиэхиньикэ кыттыыны ылар. Нэһилиэнньэлээх пууннарга уонна экономика эбийиэктэригэр куттал суоһаабат.

Баһаар сезона саҕаланыаҕытта Саха сиригэр уопсайа 182 ойуур баһаара таҕыста. Орто Халымаҕа уустук быһыы-майгы бэлиэтэнэр, манна уопсайа 175 657 гектар иэннээх сиргэ 13 баһаар бара турар.