Саха сиригэр 83 ойуур баһаара бара турар

Ааспыт суукка иһигэр Саха сиригэр бара турар ойуур баһаарын ахсаана аҕыһынан элбээтэ. Бу туһунан Россия ыксаллаах быһыыга-майгыга министиэристибэтин өрөспүүбүлүкэтээҕи салаатын пресс-сулууспата иһитиннэрэр.

«Үлэ ыытыллар уонна хонтуруолланар сирдэргэ саҥа уот көрдүгэннэрэ көстүүлэрин суотугар, баар баһаардар уопсай иэннэрэ 124 гектарынан улаатта. Дьааҥы, Кэбээйи, Муома, Томпо уонна Уус Алдан улуустарыгар уустук балаһыанньа салҕанар. Манна уопсайа 40 ойуур баһаара баар», — диэн этиллэр.

Сөҥүү суоҕунан сибээстээн, ону тэҥэ хотугулуу-илинтэн уонна хотугулуу-арҕааттан сөкүүндэҕэ 4-8 миэтэрэ түргэннээх тыаллаах буолан, Дьааҥы, Орто Халыма, Муома, Уус Майа, Абый уонна Томпо улуустарын 23 нэһилиэнньэлээх пууннарыгар ойуур баһаардарын буруота бүрүйүөн сөп.

Авиалесоохрана суһал иһитиннэриитинэн, өрөспүүбүлүкэ сиригэр-уотагар билигин уопсайа 385,77 гектар иэннээх сиргэ, 83 ойуур баһаара бара турар. Бүтэһик сууккаҕа 16 саҥа уот көрдүгэнэ үөскээтэ, олортон аҕыһа умуруорулунна. Уоту утары охсуһууга уопсайа 802 киһи уонна 81 тиэхиньикэ кыттыыны ылла.