Саха сиригэр 92 ойуур баһаара бара турар

Бүгүн, бэс ыйын 25 күнүн туругунан өрөспүүбүлүкэ үрдүнэн уопсайа 710 046 гектар иэннээх сиргэ 92 ойуур баһаара бара турар. Бу туһунан ЫБММ өрөспүүбүлүкэтээҕи салаатын пресс-сулууспата иһитиннэрэр.

«Бүтэһик суукка иһигэр эбии 28 уот үөскээтэ. Абый, Үөһээ Халыма, Дьааҥы, Орто Халыма уонна Эбээн Бытантай улуустарыгар уустук балаһыанньа салҕанар, манна баһаар сезона саҕаланыаҕыттан уопсайа 46 ойуур баһаара бэлиэтэннэ», — диэн ЫБММ өрөспүүбүлүкэтээҕи салаатын салайааччыта Павел Гарин иһитиннэрдэ.

Ойуур баһаардарын умуруорууга уопсайа 490 киһи уонна 46 тиэхиньикэ кыттыыны ылла. Кэтээн көрүүлэри ыытыыга уонна бэйэ састаабын көһөрүүгэ Дьокуускайлааҕы авиация туһанылынна.

Баһаар сезона саҕаланыаҕыттан Саха сирин үрдүнэн уопсайа 260 ойуур баһаара бэлиэтэннэ.