Саха сиригэр баар ойуур баһаардарын иэнэ улаатта

Саха сиригэр баар ойуур баһаардарын иэнэ 117 гаанан улаатта. Бу туһунан ЫБММ өрөспүүбүлүкэтээҕи салаатын пресс-сулууспата иһитиннэрэр.

Авиалесохрана суһал иһитиннэриитинэн, Саха сиригэр бүгүҥҥү күҥҥэ уопсайа 890,5 га иэннээх сиргэ 23 ойуур баһаара бара турар. Бүтэһик суукка иһигэр биир саҥа уот үөскээтэ уонна уон умуруорулунна.

Уоту утары охсуһууга суукка иһигэр 351 киһи уонна 76 тиэхиньикэ кыттыыны ылла.

Сөҥүү суоҕунан, ону тэҥэ арҕааттан уонна хотугулуу-арҕааттан үрэр тыал күүһүрэр кыаҕын учуоттаан, Уус Алдан, Таатта уонна Чурапчы улуустарын биэс нэһилиэнньэлээх пууннарын ойуур баһаардарын буруота бүрүйүөн сөп.