Саха сиригэр «Бастыҥ мас ууһа» күрэх региональнай түһүмэҕэ ааста

Бүтүн Россиятааҕы «Идэтигэр бастыҥ» бириэмийэ «Бастыҥ мас ууһа» күрэҕин өрөспүүбүлүкэтээҕи түһүмэҕин кыайыылааҕынан Сергей Перевощиков буолла. Бу туһунан СӨ тутууга министиэристибэтин пресс-сулууспата иһитиннэрэр.

Куонкурус регионнааҕы түһүмэҕин тэрийээччилэринэн өрөспүүбүлүкэ тутууга министиэристибэтэ уонна «Саха сирин тутааччыларын сойууһа» ассоциация буоллулар.

«Кыттааччылар күрэх ирдэбилинэн теоретическэй билииллэрин тургуттулар уонна практическай сорудахтары толордулар. Бары сорудахтары онлайн эрэһииминэн толордулар», — диэн этиллэр.

Куонкурус хамыыһыйатын быһаарыытынан «Бастыҥ мас ууһа» анал аат кыайыылааҕынан «АЛМАС» ХЭУо маһы таҥастыыр станоктарын оператора Сергей Перевощиков буолла.

Кини аны Воронеж куоракка «Идэтигэр бастыҥ» бүтүн Россиятааҕы идэ маастарыстыбатын куонкуруһун иккис түһүмэҕэр Саха сирин чиэһин көмүскүөҕэ.