Саха сиригэр БКЭ — ни сэттэ оҕо 100 баалга туттарда

Саха сиригэр БКЭ — ни сэттэ оҕо 100 баалга туттарда. Бастакы эксээмэннэр түмүктэрэ — география, информатика уонна литэрэтиирэ бүгүн, от ыйын 16 күнүгэр,  биллибитин туһунан өрөспүүбүлүкэ наукатын уонна үөрэҕириитин министиэристибэтэ иһитиннэрэр.

         Бастакы сүүс баалы географияҕа Дьокуускай куораттааҕы 2 № -дээх Саха — политехническай орто оскуоланы бүтэрээччи ылла. Географияҕа үрдүк баалга сэттэ сыл анараа өттүгэр,  2013 сыллаахха суруйбуттара.

         Литэрэтиирэ эксээмэнин 100 баалга биэс оскуоланы бүтэрээччи туттарда: Нерюнгри куорат 18 нүөмэрдээх орто оскуолатыттан Анастасия Анкушина, Ленскэй оройуонун Пеледуй бөһүөлэгин орто оскуолатыттан Екатерина Антипина, Дьокуускай куораттааҕы лицейтэн Владимир Печетов, Үөһээ Бүлүү улууһун Боотулу орто оскуолатыттан Юлиана Семенова уонна Чурапчы гимназиятыттан Сарадана Седалищева.

         Литэрэтиирэҕэ БКЭ — ни гуманитарнай хайысхалаах үөрэххэ киириэн баҕалаахтар туттараллар.

         Информатикаҕа уонна ИКТ хайысхатыгар 100 баалы Республикатааҕы лицей — интэринээти бүтэрээччи Далирхан Ефремов ылла. Бэлиэтээн эттэххэ,  информатика уонна ИКТ хайысхата эмиэ талыы эксээмэн буолар. Бу бирэдимиэти олохторун IT — хайысхалаах үөрэҕи кытта ситимниир буоллахтарына талаллар.