Саха сиригэр бултааһын быраабылаларыгар уларытыылар киириэхтэрэ

Саха сиригэр тайахха, кыыл табаҕа, эһэҕэ, бөрөҕө уонна андаатараҕа булт болдьоҕун уларытарга этии киирдэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Маны таһынан, куска уонна андыга тыыннаах мончуугу туһанан бултуйуу болдьоҕун көрөргө этиллэр.

Сэтинньи 17 күнүгэр өрөспүүбүлүкэ бырабыыталыстыбатын иһинэн үлэлиир бултка уонна булт хаһаайыстыбатыгар Сэбиэт сүбэ мунньаҕар, 2021 сыл тохсунньу 1 күнүттэн күүһүгэр киириэхтээх Россия бултка саҥа быраабылаларыгар сөп түбэһиннэрэн бэлэмнэнэр, «Саха сирин бултуур сирдэригэр көҥүллэнэр булт көрүҥнэрин уонна кээмэйин быһаарыы туһунан» диэн Ил Дархан ыйааҕын бырайыагын көрүү кэмигэр тустаах этиилэр киллэрилиннилэр.

СӨ экологияҕа миниистирин солбуйааччыта Николай Додохов иһитиннэрбитинэн, саҥа быраабылаларынан куобах, мас көтөрүн уонна бөрө ахсаанын бэрээдэктиир сыалтан туһаҕынан бултааһын көҥүллэммит. Бырайыакка өрөспүүбүлүкэ маннык ньыманы туһаныан сөп оройуоннара уонна туһахтар көрүҥнэрэ көррүллэллэр.

«Ону тэҥэ, туйахтаах кыылы, эһэни уонна күндү түүлээҕи хараҥа кэмҥэ бултааһыҥҥа ханнык баҕарар уотунан тыктарар тээбириннэри, тепловизордары, хараҥаҕа көрөр прибордары туһаныыны хааччахтааһын туһунан этии киирдэ», — диэн иһитиннэриигэ этиллэр.

Өрөспүүбүлүкэ бырабыыталыстыбатын бэрэссэдээтэлин бастакы солбуйааччыта Алексей Колодезников тустаах министиэристибэҕэ улуустар уонна булт болдьоҕун исписэлиистэрин этиилэрин көрөргө соруйда уонна Сэбиэт сэтинньи бүтүүтэ ыытыллар мунньаҕар уларытыылары быһаарарга соруйда.