«Саха сиригэр бырамыысыланнай балыктааһын: технологията, батарыы, астааһын» төгүрүк остуол ыытылынна

«Саха сирин балыга-2019» быыстапка-дьаарбанка чэрчитинэн тыа хаһаайыстыбатын министиэристибэтин саалатыгар өрөспүүбүлүкэ балык хаьаайыстыбалара кыттыылаах, «Саха сиригэр бырамыысыланнай балыктааһын: технологията, батарыы, астааһын» диэн тиэмэлээх төгүрүк остуол буолан ааста.

Быйыл Халыма, Индигир өрүстэргэ балык аанньа тахсыбакка, хаһаайыстыбалар соруктара ситэ туолбата буолуо диэн сабаҕалыыллар. Ол оннугар Өлүөнэ өрүскэ балыктыыр хаһаайыстыбалар табылынннылар.  Булун улууһун Күһүүрүгэр баар «Алгыс» ТХПКа быйыл сайын 30 тонна балыгы туттарда.

Баар кыһалҕаттан сиэттэрэн,  балыктарын өрөспүүбүлүкэ тас өттүгэр, Красноярсай уонна Санкт  Петербург куораттарга атыылаабыттар. Кыһалҕа кинилэргэ эрэ буолбатах, атын хаһаайыстыбалар сүрүн боппуруостарынан эмиэ батарыы чааһа буолар.  Ол анал докумоуннары уларытан, саҥалыы хайысханы солуохтаахпыт диэн бэлиэтэнэр.

Социальнай тэрилтэлэргэ, чуолаан оскуолалар, оҕо уһуйааннара, балыыһалар ити хайысхҕа тэҥинэн ылсыахтаахтарын мунньахха атыы-эргиэн уонна бырамыысыланнас палаататын бэрэсидьиэнэ Владимир Членов эмиэ таарыйда. Чуолаан, Дьокуускай куорат холобурун туһанан, атын улуустарга олохтоох бородууксуйаны, ол эбэтэр балыгы күннээҕи аһылыкка киллэрдэххэ, балыгы батарыы оннуттан син хамсыа этэ диир.

Кырдьыга да Саха сиригэр бултанар балык  өрөспүүбүлүкэ олохтоохторун остуолугар син хайа эмэ тиийэр эбит буоллаҕына, оскуолаларга, уһуйааннарга барыта кэриэтэ кэлии ас. Маныаха тустаах биэдэмистибэ эрэ буолбакка, улуус дьаһалталарын өттүттэн эмиэ болҕомто, интэриэс баар буолуохтаах.