Саха сиригэр бырамыысыланнай туризмы сайыннарыы бырайыактарын бэлэмнээтилэр

Саха сирин тэрилтэлэрэ бырамыысыланнай туризмы сайыннарыыга туһаайыллар алта пилотнай бырайыагы бэлэмнээтилэр. Бу туһунан ТАСС иһитиннэрэр.

Быйыл от ыйыгар Саҥа бырайыактары таһаарыыга стратегическай көҕүлээһиннэр ааҕыныстыбалара уонна Саха сирин бырабыыталыстыбата бырамыысыланнай туризм салаатын сайннарыыга сөбүлэһии түһэрсибиттэрэ.

«Колмар» уонна АЛРОСА бырамыысыланнай хампаанньалар, «ЭПЛ Даймонд» уонна «Киэргэ» ювелирнай хампаанньалар, «Якутия» уонна IT-паарка технопааркалар, ону тэҥэ «Сахабулт» национальнай концерн бырайыак кыттыылаахтарынан буолбуттара этиллэр.

Алта экскурсия бырайыага бэлэмнэннэ. Балаҕан ыйыгар хас биирдии тэрилтэни кытта туспа үлэ ыытыллыаҕа. Бырайыактар ситэриллибиттэрин кэнниттэн, сэтинньигэ Москваҕа тэрээһиннэри ыытар ааҕыныстыбалар уонна туроператордар иннилэригэр көрдөрүллүөхтэрэ.

Бу бырайыактар олоххо киирбиттэрин кэнниттэн атын хампаанньалар эмиэ бырамыысыланнай туризмы сайыннарыыга тардыллыахтара.

Бырамыысыланнай туризм диэн — туристар эбэтэр оҕолор бөлөхтөрүн бырамыысыланнай тэрилтэлэргэ сырытыннаран инвестиционнай кэрэхсэбили үрдэтии, алын уонна орто бизнеһы сайыннарыы, оскуола оҕолоругар уонна устудьуоннарга профориентационнай үлэлэри ыытыы буолуон сөп.