Саха сиригэр быыбар түмүгэ таҕыста

НВК САХА — Биир кэлим быыбар күнэ Саха сирин 24 улууһугар буолан ааста.

Уопсай түмүгүнэн куоластааччы 28,8 %-на кыттыыны ылла.

«Быыбарга кыттыы саамай үрдүк көрдөрүүтэ Өлөөн оройуонун Солоҕон нэһилиэгэр 100 % -ҥа тэҥнэстэ. Дьааҥыы улууһун Эһэ Хайа бөһүөлэгэр куоластааччы 91 %-на кыттыыны ылла , Үөһээ Бүлүү Харбалаах сэлиэнньэтигэр — 89,4 % куоластааччы кытынна », – диэн Саха сирин Киин быыбардыыр хамыыһыйатын бэрэссэдээтэлэ Алексей Ефимов кэпсээтэ.

Быыбарга куоластааччы кыттыытын үрдүк көрдөрүүтэ өссө Мэҥэ Хаҥалас улууһун Тарат сэлиэнньэтигэр — 82 % уонна Сыымах сэлиэнньэтигэр -75 % бэлиэтэннэ. Саамай аҕыйах куоластааччы Нерюнгри оройуонугар кыттыыны ылла — 10,96%.

Быыбар түмүгүнэн 22 муниципальнай тэриллии баһылыга талылынна: 18 нэһилиэк баһылыга, 3 улуус баһылыга уонна Жатай бөһүөлэгин баһылыга.

Аллайыаха оройуонугар «Биир ньыгыл Россия» партия чилиэнэ Яков Елисеев кыайда.

Алараа Халыма улууһун баһылыгынан Валерий Синтяков талыллынна.

Өлүөхүмэ оройуонугар Николай Харбин буолла.

Жатай бөһүөлэгэр Евгения Исаева эрэллээхтик кыайда.

Сунтаар баһылыга Эдуард Филиппов 92 % куолаһы ылан дуоһунаһыгар хаалла.

Орто Халыма куорат баһылыгынан Николай Чукров буолла.

Ленскэй оройуонун Мурбайскай нэһилиэгэр баһылыгынан Любовь Иванова талылынна, Нам улууһун I Хомустаах нэһилиэгэр — Василий Жирков, Өлүөхүмэ оройуонун Дабан нэһилиэгэр — Валентина Жирохова, Сунтаар улууһуһн Күндэйэ нэһилиэгэр — Иван Константинов, Уус Майа оройуонун Солнечнай бөһүөлэгин баһылыгынан Александр Пахомов буоллулар.

Уопсайа Саха сирин быыбарыгар 544 кандидат регистрацияламмыт. Тургутуу кэнниттэн 504 кандидат хаалбыт. Бэрэбиэркэ кэнниттэн 24 кандидат сууттана сылдьыбытын кистээбитэ биллибит.

Быыбар кэмигэр Россия уонна Саха сирин киин быыбардыыр хамыыһыйаларыгар кэһии тахсыыта бэлиэтэммэтэх.