Саха сиригэр дьоҕус бизнес экономическай биэрэпиһэ саҕаланна

Тохсунньу 15 күнүттэн Саха сирин дьоҕус бизнеһин экономическай биэрэпиһэ саҕаланна. Бу туһунан Росстат иһитиннэрэр.

«Судаарыстыбаннай статистика федеральнай сулууспата бизнес-биэрэпис бары кыттыылаахтарыгар толору кистэлэҥи мэктиэлиир. Ол аата түмүллүбүт сибидиэнньэлэр уопсай түмүгү таһаарыыга эрэ туһаныллыахтара», – диэн этиллэр.

Түмүллүбүт дааннайдарга олоҕуран дойду дьоҕус бизнеһин өйүүр бырагыраама ылыныллара биллэриллэр.

2020 сыллааҕы ааҕыы түмүгүнэн, пандемия кэмигэр өрөспүүбүлүкэ хас иккис урбаанньыта маннык өйөбүл миэрэлэринэн туһаммыт. Ил Дархан Айсен Николаев Ил Түмэҥҥэ туһаайыытыгар иһитиннэрбитинэн, 2020 сылга 12 тыһыынча бизнес субъегы өйөөһүҥҥэ биир миллиард солкуобай кээмэйдээх үп ыытыллыбыт.

Саха сирин бары юридическэй сирэйдэрэ уонна урбаанньыттара 2021 сыл муус устар 1 күнүгэр диэри отчуоттарын Росстат сайтын нөҥүө websbor.gks.ru/online электроннай илии баттааһыннаах, электроннай докумуон эргиирин оператордарын нөҥүө, sakha.msp@gks.ru электроннай почтаҕа ыытан, эбэтэр кумааҕынан докумуоннары статистика салааларыгар тиксэрэн туттараллара ирдэнэр.

Ону тэҥэ бигэргэтиллибит аккауннаах урбаанньыттар уонна электроннай илии баттааһыннаах юридическэй сирэйдэр 2021 сыл кулун тутар 15 күнүттэн ыам ыйын 1 күнүгэр диэри судаарыстыбаннай өҥө порталын gosuslugi.ru нөҥүө туттарыахтарын сөп.

Бары ирдэнэр иһитиннэрии Росстат сайтыгар баар: sakha.gks.ru/small_business.