Саха сиригэр эбии 50 киһи коронавирустаата

Ааспыт сууккаҕа өрөспүүбүлүкэҕэ эбии 50 киһи коронавирустаабыта бигэргэннэ. Бу туһунан бүгүн, бэс ыйын 26 күнүгэр Ил Дархан Айсен Николаев эпидемиологическэй балаһыанньа туһунан брифинг кэмигэр иһитиннэрдэ.

Ол курдук, Дьокуускайга эбии 45 киһи ыарыйда, Миирнэйгэ — икки, Абыйга, Мэҥэ Хаҥаласка уонна Өлөөҥҥө — биирдии.

Суукка иһигэр үс коронавируһунан сутуллубут киһи тыыннара быһынна, бары 65-тэн аҕа саастаахтара уонна эбии атын хроническай ыарыылаахтара этиллэр.

Пандемия саҕаланыаҕыттан Саха сиригэр уопсайа 3963 киһи коронавирустаата. 2906 киһи толору эмтэннэ. 31 киһи суорума суолланна.

Бүгүҥҥү күҥҥэ 33 ыалдьыбыт киһи туруга ыараханынан сыаналанар.